فساد التعليم العالي و علبة التونة! - قصة قصيرة واقعية على لسان صديقي حليمو ذيدون

المشهد الاول:

طبعا قبيل الصباح مشيت الجامعه وشلت معاي رسوم القسط التاني، بعد وصلت البوابه ومرقت البطاقه اتفاجأت بالحرس بشم البطاقه و بقول لي: بطاقتك منتهية امشي جددز دي بي فووق, يعني قاصد: "امشي يا **** سدد الرسوم"، فقلت ليهو: "أنا عندي محاضرة حسي الساعة 9 بعد 5 دقايق وهدي الرسوم في جيبي خليني احضرا وبعد داك بمشي اسدد"، قال لي: "لالا والله لو اتمسحت بي فازلين ما بخليك تخش"، طبعا في اللحظه ديك انا اندهشت واتأكدت تماما انو الحرس ديل مخهم زي حجر الدلكه، ما بفهمو نهاائي، ياخ انا طالب في سنه تالته يعني ح ازوغ وين وانا قطعت نصف المسافه الدراسية! هسي البطاقه دي فرقها شنو من علبة التونه ؟! الاتنين عندهم مدة صلاحية

المشهد الثاني:

مشيت مكتب القبول، حيث البنشات والمكيفات البارده والقلوب البارده برضو! وطبعا كنت واقف في صف عامل زي لعبة (Zuma‏) والناس تتحكحك من بنش لي بنش. حررررم نضفنا البنشات كلها، بعد شويه جات بنت نضيفة كدا، نجفه بسسس. جات شايلا قروش وحاجــات تانيـــة! حامت شويه كده في مكتب القبول مده 11 دقيقة ومرقت شايلا البطاقه! . . عملتا كيف انا ما عارف، كبتو لـ كريس آنجل زاتو المايندفريك داك زاتو! وأنا واقف ساعه ونص في صف اولو عندك وآخرو عندي.

المشهد ثالث:

وانا بفكر مع نفسي، قلت احسن البس طرحه، تاني قلت لا عشان يمكن يشيلو رقمي، تاني فكرت البس كارينا تاني قلت لأ بتكون ظاهرة لانو ما عندي مؤهــلات علميـــة! تاني فكرت البس اسكيني وكعب عالي تاني قلت لأ بعدين المشي بغلبني وبعفوني من الرسوم وبتاع!

كسرة:

انا بقترح انو الطلاب يرمو بطاقاتهم في البيت ويشيلو بدلها علبة تونه ، "تونه الوابل" بالذات لانها سمحه وبتنفعك وقت تجوع والبطاقه لا تسمن ولا تغني من جوع ! ! !



محمد عبد الحليم\حليمو ذيدون - جامعة العلوم والتقانة.